దివంగత ముఖ్యమత్రి వైఎస్ రాజశేఖర్ రెడ్డి సతీమణి.. మాజీ ముఖ్యమంత్రి వైఎస్ జగన్ తల్లి వైఎస్ విజయలక్ష్మి పుట్టినరోజు నేడు. దీంతో… షర్మిలతో పాటు చాలామంది ఆమెకు జన్మదిన శుభాకాంక్షలు చెప్పారు.
ఆ సంగతి అలా ఉంటే… అప్పటికే వైఎస్ జగన్ తన తల్లికి ఫోన్ చేసి శుభాకాంక్షలు చెప్పారో ఏమో కానీ.. ఎక్స్ వేదికగా మాత్రం ఆ విషయాన్ని ప్రకటించలేదు. తెలుగుదేశం పార్టీ జాతీయ వర్కింగ్ ప్రెసిడెంట్ నారా లోకేష్ మాత్రం… ఎక్స్ వేదికగా వైఎస్ విజయమ్మకు జన్మదిన శుభాకాంక్షలు చెప్పారు.
“శ్రీమతి వైఎస్ విజయమ్మ గారికి హృదయపూర్వక జన్మదిన శుభాకాంక్షలు.. ఈ శుభ సందర్భంగా ఆమె మంచి ఆరోగ్యం, ఆనందంతో ఉండాలని ఆకాంక్షిస్తున్నాము” అంటూ నారా లోకేష్ బర్త్ డే విషెస్ చెప్పారు.
అంతవరకూ బాగానే ఉంది. తన తండ్రి తరుపునుంచి… తాత, నానమ్మ, మేనత్తలు, బాబాయ్ లు, పిన్నిలు, అన్నలూ, తమ్ముళ్లూ ఎవరికీ ఏనాడూ ఇలా సోషల్ మీడియా వేదికగా బర్త్ డే విషెస్ చెప్పినట్లు కనిపించని లోకేష్… కారణం ఏమైనప్పటికీ.. వైఎస్ విజయలక్ష్మి విషయంలో మాత్రం ఓ అడుగు ముందుకు వేశారని చెప్పుకోవచ్చు.
అప్పటికి ఇంకా జగన్ విషెస్ చెప్పలేదు కాబట్టి.. తాను ముందు చెప్పాలని, తద్వారా వైసీపీ శ్రేణులను గిల్లాలని భావించారో.. లేక, తన రాజకీయ భవిష్యత్తుకు వైఎస్ విజయమ్మ సానుభూతి సైతం కావాలని కోరుకుంటున్నారో.. అదీగాక, షర్మిలపై కృతజ్ఞతతో స్పందించారో తెలియదు కానీ.. గతంలో “వైఎస్ విజయ” అంటూ ఏకవచనంతో సంభోదిస్తూ అగౌరవపర్చిన లోకేష్.. నేడు మాత్రం “వైఎస్ విజయమ్మ” అని సంబోధిస్తూ పోస్ట్ పెట్టడం గమనార్హం.
అదంతా ఒకెత్తు అయితే… లోకేష్ కనుసన్నల్లో నడుస్తున్నాయని ఆరోపించబడే పలు టీడీపీ అనుకూల వెబ్ సైట్స్ లో ఈ వ్యవహారంపై జగన్ ను దెప్పిపొడుస్తూ వార్తలు హల్ చల్ చేస్తున్నాయి. విజయమ్మకు నారా లోకేష్ శుభాకాంక్షలు చెప్పారు కానీ, జగన్ మాత్రం తన తల్లికి శుభాకాంక్షలు చెప్పలేకపోయారు.. వైఎస్ విజయమ్మకు జగన్ బర్త్ డే విషెస్ చెప్పనంత దూరం జరిగిపోయారా.. అంత గ్యాప్ పెరిగిపోయిందా.. డాక్టర్ వైఎస్సార్ కుటుంబంలో ఈ పరిస్థితా అంటూ అల్లాడిపోతున్నట్లు కనిపిస్తున్నారు.
ఇక్కడ గమనించాల్సిన విషయం ఏమిటంటే… నారా చంద్రబాబు కుటుంబంలో ఏమి జరుగుతుంది..? ఆయన తన తల్లి తల్లితండ్రులను ఎలా చూసుకున్నారు..? తోబుట్టువులను ఎలా ఆదుకున్నారు..? తమ్ముడికి ఎలా తోడున్నారు..? అసలు ఎప్పుడూ వారి పేర్లు సైతం ఎందుకు ప్రస్తావించరు..? పూర్తిగా ఇల్లరికం వచ్చిన అల్లుడిగానే ఎందుకు వ్యవహరిస్తారు..? లోకేష్ సైతం తాను ఎన్టీఆర్ మనవడిని అంటారే తప్ప, నారా కర్జూర నాయుడు వారసుడిని అని ఎందుకు చెప్పరు..? అని వైసీపీ నేతలు ఏనాడు అడగలేదు!
కర్జూర నాయుడు వర్ధంతికి, జయంతికి జగన్ పోస్టులు పెట్టారా..? చంద్రబాబు, లోకేష్ లు వాళ్ల గురించి ఎప్పుడూ ప్రస్థావించరు గనుక.. మనం గిల్లుదామని వైసీపీ వర్గాలు ఎప్పుడైనా ఆలోచించాయా..? ఈ విషయం లోకేష్ & కో కి తెలియంది కాదు. కాకపోతే… పిల్ల చేష్టలు, గిచ్చే పనులు చేయాలని కాకపోతే… ఎందుకు ఇవన్నీ అని అంటున్నారు పరిశీలకులు!
విజయమ్మకు లోకేష్ బర్త్ డే విషెస్ చెప్పడం తప్పుకాదు.. కానీ, జగన్ ఎందుకు చెప్పలేదంటూ అనుకూల మీడియాలో వార్తలు రాయించుకోవడమే అసహ్యంగా ఉందని అభిప్రాయపడుతున్నారు!
ఇదే సమయంలో… అసలు చంద్రబాబు తండ్రి, తల్లి పేర్లు.. వాళ్ల జయంతులు, వర్ధంతుల గురించి ఎవరికైనా ఏమైనా తెలుసా..? వాళ్ల బర్త్ డే లకు చంద్రబాబు కానీ, లోకేష్ కానీ ఎప్పుడైనా స్పందించారా..? రాష్ట్రవ్యాప్తంగా అన్నదానాలు, రక్తదానాలు వంటివి ఎప్పుడైనా చేశారా..? అటు చంద్రబాబు అయినా, ఇటు లోకేష్ అయినా… తాము నందమూరి ఇంటి అల్లుల్లగానే చెప్పుకోవడానికి ఉత్సాహం చూపిస్తారు తప్ప… ఖర్జూర నాయుడి వారసులమని చెప్పుకోరు ఎందుకు?… అయినా ఇవన్నీ ఎందుకు..?
ఏది ఏమైనా… కొత్తగా టీడీపీకి వర్కింగ్ ప్రెసిడెంట్ అయిన లోకేష్.. విజయమ్మతో పాటు తన తాత ఖర్జూర నాయుడు, తన నానమ్మతో పాటు అమ్మమ్మ లక్ష్మీ పార్వతిని సైతం ఇలాంటి విషయాల్లో గుర్తు పెట్టుకోవాలని పలువురు కోరుకుంటున్నారు. లోకేష్ మారిపోయారంటూ ప్రశంసలు కురిపిస్తున్నారు. ఇదే సమయంలో రాఖీ పండుగ రోజు చంద్రబాబు తన తోబుట్టువులను కలవాలని.. వారికి భువనేశ్వరి చీర, సారె పెట్టి గౌరవించాలని, అభిమానించాలని సైతం వారు కోరుకుంటున్నారు. ప్రజాసేవలో పడి కుటుంబ సభ్యులను నిర్లక్ష్యం చేయకూడదని సూచిస్తున్నారు.