ప్రకటన: గతమెంతో ఘనం.. వర్తమానం అయోమయం.. భవిష్యత్తు ప్రశ్నార్థకంగా ఉన్న పార్టీకి ఎంపీ అభ్యర్థులు కావలెను! 40 సంవత్సరాలకు పైగా అనుభవం ఉన్న సీనియర్ లీడర్ ఆధ్వర్యంలో, హస్తిన కేంద్రంగా పనిచేయుటకు అభ్యర్థులు కావలెను!
అర్హతలు: ఆ పార్లమెంటు పరిధిలో ఉన్న అసెంబ్లీ నియోజకవర్గాలకు ఆర్థికంగా చేయుతనివ్వగలిగే శక్తి కలిగి ఉండాలి!
బలమైన వ్యాపార సామ్రాజ్యాలు కలిగి.. పార్టీకి అవసరమైనప్పుడు ఆర్థికంగా ఆదుకునే బలవంతులకు ప్రాధాన్యత!
సామాజికవర్గం అనే అంశం పరిగణలోకి తీసుకోబడుతుంది!
నిబంధనలు: పార్టీ పరిస్థితి బాగోని పక్షంలో.. కేంద్రంలో అధికారంలో ఉన్న పార్టీలో చేరి గూడచర్యం చేయాల్సి రావొచ్చు! అందుకు సిద్ధపడిన అర్హులు టీడీపీ ఆఫీసులో ఇంటర్వ్యూలకు రావొచ్చు! – టెరంస్ & కండిషన్స్ అప్లై!
టీడీపీకి ఎంపీ అభ్యర్థుల కొరత పుష్కలంగా ఉందంటూ… ప్రస్తుతం సోషల్ మీడియాలో హల్ చల్ చేస్తున్న సరదా కం సెటైరికల్ ప్రకటన ఇది!
అయితే సరిగ్గా పరిశీలిస్తే… ఆ ప్రకటన సరదాకి పెట్టినట్లు ఉన్నా.. వాస్తవం కూడా అదే అనే అంటున్నారు టీడీపీ నేతలు! వివరాల్లోకి వెళ్తే… గత ఎన్నికల్లో తెలుగుదేశం పార్టీకి మూడు పార్లమెంటు స్థానాలు మాత్రమే దక్కాయి. విజయవాడ, గుంటూరు, శ్రీకాకుళంలో మాత్రమే టీడీపీ ఎంపీ అభ్యర్థులు గెలిచారు.
అయితే అధికారంలో లేకపోవడం.. హస్తిన పెద్దలతో బాబుకి సంబందాలు తెగిపోవడంతో.. ఆర్థికంగా బలహీనపడిన నేతలు ఎంపీగా పోటీ చేయడానికి ముందుకు రావడం లేదట. దీనికితోడు ఏపీలో ప్రస్తుతం చంద్రబాబు… అసెంబ్లీ స్థానాలపై పెట్టిన దృష్టి.. పార్లమెంటు స్థానాలపై పెట్టడం లేదని పార్టీ నేతలే విమర్శిస్తున్నారంట.
ఫలితంగా… కోస్తా ప్రాంతంలోని రెండు మూడు నియోజకవర్గాల్లో తప్ప టీడీపీకి పార్లమెంటుకు పోటీ చేసే బలమైన అభ్యర్థులు లేరని ఆఫ్ ద రికార్డ్ టీడీపీ నేతలు చెబుతున్న మాటలు. ఇప్పటి వరకూ రాజంపేట ఎంపీ అభ్యర్థిగా గంటా నరహరిని మాత్రమే అధికారికంగా ప్రకటించారు చంద్రబాబు. ఇక గత ఎన్నికల్లో ఎంపీలుగా పోటీ చేసి ఓడిపోయిన వారున్నారు కదా అనుకుంటే… వారిలో నలుగురైదుగురు తప్ప ఎవరూ యాక్టివ్ గా లేరట! అయితే… ఇలా ఎంపీ అభ్యర్థులు వెనకడుగువేయడంతో… వారంతా ఎందుకొచ్చిన రిస్క్ అనుకుంటున్నారా.. లేక, మరో ఆలోచన ఏమైనా చేస్తున్నారా అన్నది బాబు & కో లకు ఓపట్టాన్న అర్థం కావడం లేదంట!
మరి.. ఆన్ లైన్ లో హల్ చల్ చేస్తున్న ఆ సరదా ప్రకటనని ఎవరైనా సీరియస్ గా తీసుకుని బాబుని సంప్రదిస్తారా లేదా అన్నది వేచి చూడాలి!