TDP Then and Now : తెలుగుదేశం పార్టీ శ్రేణులు ఘనంగా ఓ వైపు పార్టీ ఆవిర్భావ దినోత్సవ వేడుకల్ని నిర్వహిస్తోంటే, ఇంకోపక్క తెలుగు తమ్ముళ్ళు లోలోపల ‘పార్టీని ఎలా చేసేశావ్ చంద్రన్నా..’ అంటూ ఆవేదనతో రగిలిపోతున్నారు. పైకి చెప్పుకోగలిగినవారు, ఆ మాట చెప్పేసి టీడీపీకి దూరమైపోతున్నారు. చెప్పలేనివారు ఇంకా టీడీపీలో అలాగే కొనసాగుతున్నారు.
నాలుగు పదుల వయసు టీడీపీ సొంతం. స్వర్గీయ నందమూరి తారకరామారావు స్థాపించిన తెలుగుదేశం పార్టీకి, ఇప్పుడున్న తెలుగుదేశం పార్టీకీ అసలు పొంతనే లేదు. అప్పట్లో యువ నాయకత్వానికి తెలుగుదేశం పార్టీ నిఖార్సయిన వేదిక. ఇప్పుడేమో, ఆ యువ నాయకత్వం టీడీపీ వైపు చూడటంలేదు.
చంద్రబాబు వారసుడిగా నారా లోకేష్ ప్రొజెక్షన్ ఎప్పుడైతే ప్రారంభమైందో, అప్పటినుంచే టీడీపీ పతనం మొదలైందంటారు చాలామంది. కాదు కాదు, స్వర్గీయ నందమూరి తారకరామారావుని రాజకీయంగా వెన్నుపోటు పొడిచాక, టీడీపీ చచ్చిపోయిందంటారు ఇంకొందరు. ఎవరి వాదన వారిదే.! (TDP Then and Now )
‘నన్ను మోసం చేశాడు నా అల్లుడు..’ అంటూ ఆనాడు కన్నీరు మున్నీరయ్యారు స్వర్గీయ నందమూరి తారకరామారావు. ఆ రామారావు మీద చెప్పులేయించిన చంద్రబాబు, ఇప్పుడు అదే ఎన్టీయార్ మీద పొగడ్తల వర్సం కురిపిస్తుంటారు.. ఎన్టీయార్ భజనలో మునిగి తేలుతుంటారు. రాజకీయం అంటేనే అంత.
అప్పట్లో తెలుగునాట తెలుగుదేశం పార్టీ అంటే ఓ ఆశ. ఇప్పుడేమో నిరాశ. ఒకప్పటి టీడీపీది వెలుగుల చరిత్ర.. ఇప్పుడేమో మసకబారిపోతున్న చరిత్ర. టీడీపీని సంక్షోభంలోకి నెట్టేసి అవకాశాలు వెతుక్కున్నారు చంద్రబాబు. పైగా, ఎన్టీయార్ పార్టీని స్థాపించిన ముహూర్త బలం గొప్పదంటూ చంద్రబాబు పిట్ట కథలు చెబుతున్నారిప్పుడు.