MLA Galla Madhavi: రాజకీయాల్లో మార్పు అంటే కేవలం మాటల్లోనే కాదు, చేతల్లోనూ ఉంటుందని నిరూపించారు గుంటూరు పశ్చిమ ఎమ్మెల్యే గల్లా మాధవి. సమాజంలో వివక్షకు గురవుతూ, ఉపాధి దొరకక యాచన వృత్తిని నమ్ముకున్న ఒక ట్రాన్స్జెండర్ జీవితంలో ఆమె వెలుగులు నింపారు. తన వ్యక్తిగత సహాయకురాలిగా (పీఏ) ఒక ట్రాన్స్జెండర్ను నియమించుకుని, అందరి ప్రశంసలు అందుకుంటున్నారు.
కొద్దిరోజుల క్రితం గుంటూరులో జరిగిన ఒక కార్యక్రమంలో కొంతమంది ట్రాన్స్జెండర్లు యాచన కోసం వచ్చారు. అక్కడ వర్షిణి అనే ట్రాన్స్జెండర్ను గమనించిన ఎమ్మెల్యే మాధవి, ఆమెతో మాట్లాడి వివరాలు ఆరా తీశారు. ఆమె బీకామ్ వరకు చదివినట్లు తెలుసుకున్న ఎమ్మెల్యే, “చదువుకుని కూడా ఇలా ఎందుకు అడుక్కుంటున్నావు?” అని ప్రశ్నించారు.
దానికి వర్షిణి స్పందిస్తూ.. “మాకు ఉద్యోగం ఎవరు ఇస్తారు మేడమ్? అందుకే ఈ దారి ఎంచుకోవాల్సి వచ్చింది” అని ఆవేదన వ్యక్తం చేసింది. ఈ మాటలు ఎమ్మెల్యేను ఆలోచింపజేశాయి.
ఎమ్మెల్యే మాధవి వెంటనే స్పందిస్తూ తన వద్ద ఉద్యోగం చేస్తావా? అని అడిగారు. మొదట నెలకు ₹15,000 జీతం ఇస్తానని ప్రతిపాదించగా, యాచన ద్వారానే తమకు నెలకు సుమారు ₹30,000 వరకు వస్తుందని వర్షిణి పేర్కొంది. అయితే, గౌరవప్రదమైన జీవితం విలువను వివరించిన ఎమ్మెల్యే, ₹25,000 జీతంతో తన పీఏగా నియమించుకుంటున్నట్లు ప్రకటించారు.
దీంతో వర్షిణి సంతోషంగా ఆ ఆఫర్ను అంగీకరించింది. విధుల్లో చేరిన సుమారు 20 రోజుల్లోనే ఎమ్మెల్యే వెంట ఉంటూ రాజకీయ, అధికారిక కార్యక్రమాల్లో చురుగ్గా పాల్గొంటోంది.
కుటుంబం నుంచి ఆదరణ లేకపోవడం, సమాజంలో వెక్కిరింపులు, ఎన్ని ఆఫీసుల చుట్టూ తిరిగినా ఉద్యోగం రాకపోవడం వంటి ఎన్నో సవాళ్లను వర్షిణి ఎదుర్కొంది. చివరకు జీవనోపాధి లేక అద్దె ఇంట్లో ఉంటూ రైళ్లు, ట్రాఫిక్ సిగ్నళ్ల వద్ద యాచించేది. ఇప్పుడు ఎమ్మెల్యే గల్లా మాధవి తీసుకున్న నిర్ణయంతో ఆమె జీవితం మలుపు తిరిగింది.
“ట్రాఫిక్ సిగ్నళ్లు, రైళ్లలో ట్రాన్స్జెండర్లు పడుతున్న ఇబ్బందులను చూసి చలించిపోయాను. వారికి గౌరవప్రదమైన జీవనోపాధి కల్పించాలనే ఉద్దేశంతోనే ఈ నిర్ణయం తీసుకున్నాను.” – గుంటూరు పశ్చిమ ఎమ్మెల్యే గల్లా మాధవి
సోషల్ మీడియాలో ప్రశంసల వెల్లువ
ఎమ్మెల్యే తీసుకున్న ఈ సాహసోపేతమైన మరియు మానవీయ నిర్ణయంపై సోషల్ మీడియా వేదికగా ప్రశంసలు కురుస్తున్నాయి. ఇతర ప్రజా ప్రతినిధులు కూడా ఇలాంటి స్ఫూర్తిదాయక నిర్ణయాలు తీసుకుంటే ట్రాన్స్జెండర్ల జీవితాల్లో మార్పు వస్తుందని నెటిజన్లు కొనియాడుతున్నారు.
