గ్గాలి….!!
(సడ్లపల్లె చిదంబరరెడ్డి)
***
గాలి సోకింది/గాలి చెరిసింది
అన్నది పల్లె ప్రజల పలుకుబడి!!
అంటే…??
దయ్యం పట్టడం! భూతం ఆవేసించడం!!
ఎవరికి??
నిరాదరణకు లోనయిన
గుర్తింపుకు నోచుకోని
అణచివేతకు గురి అయిన
సదుపాయాలలేమి సమూహానికి!!
ఈ దయ్యం ఆవేసిస్తే……
తనవారెవరో తెలియదు
ఏ సమయంలో ఎక్కడుండాలో
ఎలా ప్రవర్తించాలో తెలియని పిచ్చితనం!!
ఇది శాస్త్రీయ వివరణే!
వర్తిస్తుంది అక్షరాలా మా రాయల సీమక్కూడా!!
మొదటి కాలపు జనపద జీవనం ఛిద్రం చేసి
రాచరిక కీచక కీటకాలు అదికారాలకెక్కి
భూమితల్లి సహజ సంపదలు
చెట్టూ పుట్టా రాయీరప్పా ఇసుకా గుట్టా
బకాసుర వారసత్వమై దోచి
నిరాదరణల నీళ్లలో నిలువునా ముంచేశాక….
తడి తడి నీటి మూటల్ని
సంతనుంచి నాన్న తినుబండారాల్ని తెచ్చినట్లు
మోసుకొస్తున్న నైఋతి ఋతుమేఘాలకు
గాలి సోకి…..
విడిపించే దయా దన్వంతరే లేక
దీర్ఘ రోగంగా స్థిరపడిపోయింది!!
రోగగ్రస్థ గాలి….. గాలిదుమారమై
స్వగృహ సీమ భూముల ప్రాంతానికి కాక
వేరెక్కడికో
నల్లని మేఘాల జడల్ని విరబోసుకొని
పరుగుల పిశాచంగా వెళ్లి పోతోంది!!
మా వర్షఋతువుల మాతకు ఆవేసించిన
గాలి దయ్యాన్ని విడిపించే
ఆధునిక వైద్య దయానిధి ఎప్పుడు అవతరిస్తాడో??
అప్పటి దాకా…. మేమంతా, ఈ వెర్రి
వేగాల వడగాడ్పుల దెబ్బల్ని భరించలేక
పల్లె తల్లికి తలకొరివిపెట్టి పాడె మీదికి చేర్చిన
పాపాల్ని మోస్తూ పట్నం తీరాలకు……. వలస పురుగులై!!
(నా 50 యేళ్ల పరిశీలనలో జూన్ నెలలో మొదలైన గాలులు ఎప్పుడు ఆగుతాయో.. అప్పుడే మేము నాలుగు చినికుల మొఖం చూసేది!!
ఈ రోజు ఆగష్టు 3. మెట్ట ప్రాంతాల్లో గింజలు విత్తే కాలం దాటి పోయింది. ఇప్పటి దాకా ఎండిన మట్టితల్లి పెదవులు తడిసేలా పదును వాన పడలేదు.
అలా ఊరిస్తూ ఆకాశంలో మేఘాలు కనిపిస్తూ తూర్పు వైపు పరుగో పరుగు!!)