నల్లగొండలో రోడ్డు ప్రమాదంలో చనిపోయిన పోచంపల్లి ఎస్ ఐ మధుసూధన్ కుటుంబ గాథ ఇది. ఆయన పెళ్లి రోజే ఆయనకు చివరి రోజైంది. ఈ విషయం తెలుసుకున్న ప్రతి ఒక్కరు కంటతడి పెట్టారు.
నల్లగొండలో డ్యూటికి వెళుతూ ఎస్ ఐ మధుసూధన్ రోడ్డు ప్రమాదానికి గురై మంగళవారం ఉదయం చనిపోయిన విషయం తెలిసిందే. మధుసూధన్ స్వస్థలం తిప్పర్తి మండలం తానేదారిపల్లి. కోన కొండయ్య, అంజమ్మల రెండో కొడుకు మధుసూధన్. మధుసూదన్ ఎన్నో కష్టాలు పడి చదువుకొని పైకొచ్చాడు. నల్లగొండ కలెక్టర్ గా విజాయనంద్ పని చేసినప్పుడు కలెక్టర్ బంగ్లాలో చిన్న ఉద్యోగిగా పని చేశాడు.
నల్లగొండ మండలం చందనపల్లి గ్రామానికి చెందిన జంజిరాల జ్యోతి కలెక్టరేట్ లో ఔట్ సోర్సింగ్ ఉద్యోగిగా పని చేసేది. వారిద్దరి మధ్య ఏర్పడిన పరిచయం ప్రేమగా మారి పెళ్లికి దారి తీసింది. 2011 మార్చి 5 న వారు ప్రేమ వివాహం చేసుకున్నారు. 2012 లో మధుసూధన్ కు ఎస్ ఐగా ఉద్యోగం వచ్చింది. మధుసూధన్ భార్య జ్యోతి ఎంటెక్ పూర్తి చేసింది. వీరికి ఒక కూతురు, ఒక కుమారుడు ఉన్నారు. మధు సోదరుడు నాగరాజు కరెంట్ మెకానిక్ గా, మరో సోదరుడు రమేష్ మెడికల్ రిప్రంజెటర్ గా పని చేస్తున్నారు.
ప్రభుత్వ ఉద్యోగం ఉండడంతో కుటుంబానికి పెద్ద దిక్కుగా మధే ఉండేవాడు. సౌమ్యునిగా పేరున్న మధుకు పెళ్లి రోజే చివరి రోజు కావడం అందరిని కలిచి వేసింది. గ్రామస్థులు భోరుమన్నారు. సహచర పోలీసులు కూడా మధును తలుచుకుని కన్నీరు పెట్టారు. ఎవరికి ఏ ఆపద ఉన్నా మధు ఆదుకునేవారని వారు గుర్తు చేశారు. ప్రజలతో ఓ ఫ్రెండ్ లా ఉండేవాడని ఏ నాడు ఎస్ ఐగా తన గర్వం చూపలేదన్నారు.
ఎస్ఐ మధుసూధన్ భార్య జ్యోతి, పిల్లలు దుర్గా దీక్షిత్, శ్రీ వైష్ణవిలు వారం రోజులుగా జ్వరంతో బాధపడుతున్నారు. మధుకు రెండు రోజులు సెలవు ఇచ్చి అత్యవసరంగా సెలవులు రద్దు చేసినట్టు తెలుస్తోంది. ముందు రోజు శివరాత్రి బందోబస్తులో పాల్గొన్న మధు వెంటనే నల్లగొండలోని ఈవెంట్స్ డ్యూటికి బయల్దేరి వెళ్లారు. డ్రైవర్ కుమార్తెకు జ్వరం రావడంతో ఆసుపత్రికి వెళ్లాలని డ్రైవర్ అనడంతో మధు డ్రైవర్ కు సెలవిచ్చాడు. తాను నడుపుతూ వెళ్లి ప్రాణాలు కోల్పోయాడు.
వాహనం బోల్తాపడినప్పుడు స్టీరింగ్ ఛాతికి బలంగా తాకడంతోనే మధు చనిపోయినట్టు తేలింది. మధు భార్య జ్యోతికి ప్రభుత్వ ఉద్యోగం, ఇతర అలవెన్స్ లు అందజేస్తామని రాచకొండ సీపీ మహేష్ భగవత్ అన్నారు. మధు పిల్లలు విలపించిన తీరు అందరిని కంటతడి పెట్టించింది. చిన్నతనంలోనే తండ్రిని కోల్పోయి వారు విలపించిన తీరు అందరి హృదయాలను కలిచి వేసింది.