MLC Ashokbabu Arrest : తెలుగుదేశం పార్టీకి చెందిన ఎమ్మెల్సీ అశోక్ బాబుని ఏపీ సీఐడీ పోలీసులు అరెస్ట్ చేశారు. ఆంధ్రప్రదేశ్ రాష్ట్రంలో సీఐడీ అరెస్టులు సర్వసాధారణమైపోయాయి. కేసులు నమోదవుతున్నాయి, నాయకులు అరెస్టవుతున్నారు, దాని చుట్టూ రాజకీయం నడుస్తోంది.. బెయిల్ మీద నాయకులు విడుదలవుతున్నారు.. ఇదంతా ఓ ప్రసహనం.
చాలా కేసుల్లో ఏపీ సీఐడీకి న్యాయస్థానాల్లో చుక్కెదురవుతున్నమాట వాస్తవం. అరెస్టు సక్రమంగా లేదన్న కారణంగానే ఈ మొట్టికాయలు పడుతున్నాయంటూ ఎప్పటికప్పుడు మీడియాలో కథనాలు చూస్తూనే వున్నాం. అరెస్టుల మీద అరెస్టులు జరుగుతుండడంతో, ‘అరెస్టు’ అన్న మాటకే విలువ లేకుండా పోయింది.
అయితే, చట్టం తన పని తాను చేసుకుపోవాలి కదా.? అశోక్ బాబు విషయంలో అయితే, ఇది నిజానికి పాత ఆరోపణ. తప్పుడు డిగ్రీతో ఉద్యోగం పొందారన్నది అశోక్ బాబుపై ఆరోపణ. ఆయనెప్పుడో పదవీ విరమణ పొందారు.. తెలుగుదేశం పార్టీలో చేరిపోయారు. ఇప్పుడు ఆ పాత ఆరోపణతో అరెస్టు చేయడమేంటబ్బా.? రాజకీయాల్లో అంతే.
తాను తప్పు చేయలేదన్నది అశోక్ బాబు ఆరోపణ. అక్రమ అరెస్టు.. అంటూ టీడీపీ శ్రేణులు గగ్గోలు పెడుతున్నాయి. కేసు విచారణ జరిగితే, తప్పు చేశాడా.? లేదా.? అన్నది తేలుతుంది. కానీ, కేసు విచారణ పూర్తయ్యేదెప్పుడు.? ఇది ఇంకో మిలియన్ డాలర్ల ప్రశ్న.
ఈ అరెస్టు వ్యవహారంతో అశోక్బాబుకి అదనపు పబ్లిసిటీ వచ్చిపడింది. పేరుకి టీడీపీ ఎమ్మెల్సీనే అయినా, ఈయనకు అసలు పేరంటూ వచ్చింది ఉద్యోగ సంఘాల నాయకుడిగా.. ఆ తర్వాత సమైక్యాంధ్ర ఉద్యమంలో ఆరడుగుల బుల్లెట్టుగా బోల్డంత పబ్లిసిటీ లభించిందాయనకి. అలా ఆయన ఆ తర్వాత రాజకీయాల్లోకి వచ్చారు.