KCR Gets BJP Fever : తెలంగాణ ముఖ్యమంత్రి కల్వకుంట్ల చంద్రశేఖర్ రావు ఇటీవల కేంద్ర బడ్జెట్టుపై దుమ్మెత్తిపోస్తూ, రాజ్యాంగాన్ని మార్చేయాలనేంత స్థాయికి ఆవేశపడిపోయారు. ‘దించుతం.. నరేంద్ర మోడీ ప్రభుత్వాన్ని పడగొడతం..’ అంటూ కేసీయార్ చేసిన వ్యాఖ్యల్ని ఎలా మర్చిపోగలం.?
ప్రధాని నరేంద్ర మోడీ తెలంగాణ రాష్ట్రానికి వస్తే, ప్రోటోకాల్ ప్రకారం కూడా ఆయనకు స్వాగతం పలికేందుకు కేసీయార్ వెళ్ళలేకపోయారు. అస్వస్థత కారణంగా ప్రధాని నరేంద్ర మోడీ పర్యటనకు దూరమైన కేసీయార్.. అంటూ అధికారిక ప్రకటన బయటకు వచ్చింది.
‘ప్రధాని పర్యటనను కేసీయార్ బాయ్కాట్ చేయబోతున్నారట..’ అంటూ తొలుత లీకులు బయటకు వచ్చాయి. ‘అబ్బే, అలాంటిదేమీ లేదు. ప్రధాని వెంట కేసీయార్ వుంటారు..’ అంటూ ఇంకో ప్రచారం తెరపైకొచ్చింది. అయితే, ప్రధానికి స్వాగతం పలికే బాధ్యతల్ని మంత్రి తలసాని శ్రీనివాస్ యాదవ్ భుజాల మీద కేసీయార్ పెట్టడంతో.. విషయం అందరికీ అర్థమయిపోయింది.
ప్రధాని నరేంద్ర మోడీకి మొహం చూపించలేక కేసీయార్, ఆయన పర్యటనకు దూరంగా వున్నారంటూ సర్వత్రా అభిప్రాయాలు వ్యక్తమవుతున్నాయి. ‘తూచ్, అలాంటిదేమీ లేదు.. ఏమాత్రం ఆరోగ్యం కుదుటపడినా, కేసీయార్.. ప్రధాని పర్యటనకు హాజరవుతారు..’ అంటూ ఊదరగొట్టేశారు గులాబీ నేతలు.
‘నరేంద్ర మోడీ పేరు చెప్పగానే కేసీయార్కి జ్వరం వస్తుంది.. అది నిజమైన జ్వరం కాదు.. బీజేపీ అంటే వణుకు..’ అంటూ కేసీయార్ మీద తెలంగాణ బీజేపీ అధ్యక్షుడు బండి సంజయ్ విమర్శలు చేసేశారు. ఇంకోపక్క ‘షేమ్ ఆన్ యు కేసీయార్..’ అంటూ సోషల్ మీడియాలో ట్రోలింగ్ జరుగుతోంది.