ఐదు నుంచి ఇరవై కోట్ల వరకూ ఒక్కో ఎమ్మెల్యేకీ ఇచ్చి కొనుగోలు చేశారు టీడీపీ అధినేత చంద్రబాబు.. అంటూ మొన్నామధ్యన వైసీపీ తీవ్ర ఆరోపణలు చేసిన సంగతి తెలిసిందే. గెలిచిన ఎమ్మెల్యేకి దాదాపు ఇరవై కోట్లు చెల్లించే పరిస్థితి వుంటే.. ఓ వ్యక్తి ఎమ్మెల్యేగా గెలవాలంటే ఇంకెంత ఖర్చవుతుంది.?
2024 ఎన్నికలకు ఏడాది సమయమే వుంది. ఆశావహులు టిక్కెట్ల కోసం తమవంతు ప్రయత్నాల్లో వున్నారు. అధికార వైసీపీ బెస్ట్ ఆప్షన్ చాలామందికి. ఆ ఛాన్స్ లేకపోతే, ప్రధాన ప్రతిపక్షం తెలుగుదేశం పార్టీ వైపు చూస్తారు. జనసేన, బీజేపీ.. చివరి స్థానాల్లో వుంటాయ్.
అయితే, అభ్యర్థులు తాము చేయాల్సిన ఖర్చు విషయమై ముందస్తు ఏర్పాట్లు చేసుకోవడం మామూలే. దాంతోపాటుగా, ఆయా పార్టీలు చేసే చెల్లింపులపైనా ముందస్తు అవగాహన ఆయా నాయకులకు తప్పనిసరి.
అధికార పార్టీకి అభ్యర్థులు కరవయ్యారనీ, 50 నుంచి వంద కోట్లైనా ఖర్చు చేయడానికి అధికార పార్టీ సిద్ధంగా వుందనీ, ఈ క్రమంలోనే ఇతర పార్టీల నుంచి నాయకుల్ని వైసీపీ లాగుతోందనీ ఓ ప్రచారం తెరపైకొచ్చింది టీడీపీ అనుకూల మీడియా ద్వారా.
50 నుంచి 100 కోట్ల ఖర్చు అన్నది ఇటీవలి కాలంలో సర్వసాధారణమైపోయింది. ఆయా పార్టీలు అంత మొత్తంలో ఖర్చు చేయడానికీ వెనుకాడ్డంలేదు. వైసీపీ, టీడీపీ.. ఈ రెండు పార్టీలూ.. ఈ స్థాయిలో ఖర్చు చేయడానికి సిద్ధంగానే వున్నాయన్నది ఓ ప్రచారం. ఇందులో నిజమెంతోగానీ.. వచ్చే ఎన్నికలు మాత్రం అత్యంత ఖరీదైన ఎన్నికలు కాబోతున్నాయ్.!