Chandrababu Tirumala Visit: ఆంధ్రప్రదేశ్ ముఖ్యమంత్రి నారా చంద్రబాబు నాయుడు మనవడు, రాష్ట్ర ఐటీ శాఖ మంత్రి నారా లోకేశ్ కుమారుడు దేవాన్ష్ జన్మదిన వేడుకలు శనివారం తిరుమల పుణ్యక్షేత్రంలో అత్యంత వైభవంగా జరిగాయి. ఈ సందర్భంగా చంద్రబాబు నాయుడు తన కుటుంబ సభ్యులతో కలిసి శ్రీ వేంకటేశ్వర స్వామిని దర్శించుకుని ప్రత్యేక పూజలు నిర్వహించారు.
శనివారం ఉదయం ముఖ్యమంత్రి చంద్రబాబు నాయుడు, ఆయన భార్య భువనేశ్వరి, మంత్రి లోకేశ్, మనవడు దేవాన్ష్తో కలిసి వైకుంఠం క్యూ కాంప్లెక్స్ ద్వారా ఆలయానికి చేరుకున్నారు. టిటిడి అధికారులు, అర్చకులు వీరికి పూర్ణకుంభంతో స్వాగతం పలికారు. దర్శనానంతరం రంగనాయకుల మండపంలో పండితులు వేదాశీర్వచనం చేయగా, అధికారులు తీర్థప్రసాదాలు అందజేశారు.
రూ. 44 లక్షల భారీ విరాళం.. భక్తులకు స్వయంగా వడ్డన. దేవాన్ష్ పుట్టినరోజును పురస్కరించుకుని నారా కుటుంబం సేవా గుణాన్ని చాటుకుంది.
అన్నదానం: శ్రీ వేంకటేశ్వర అన్నప్రసాదం ట్రస్టుకు ఒకరోజు వితరణ ఖర్చు నిమిత్తం రూ. 44 లక్షల విరాళాన్ని అందజేశారు.
వడ్డన: అనంతరం మాతృశ్రీ తరిగొండ వెంగమాంబ అన్నప్రసాద సముదాయానికి చేరుకున్న చంద్రబాబు కుటుంబం, అక్కడ భక్తులకు స్వయంగా అల్పాహారం వడ్డించారు. ఆపై భక్తులతో కలిసి కూర్చుని అన్నప్రసాదాన్ని స్వీకరించారు.
భక్తులతో ముచ్చటించిన సీఎం.. ‘ఏఐ’ టెక్నాలజీపై హామీ. దర్శనం ముగించుకున్న తర్వాత సీఎం చంద్రబాబు తన కాన్వాయ్ను పక్కన పెట్టి తిరుమల మాడ వీధుల్లో సామాన్య భక్తుడిలా నడిచారు.
భక్తులను ఆపి వారి యోగక్షేమాలను, లడ్డూ ప్రసాదం నాణ్యతను అడిగి తెలుసుకున్నారు. లడ్డూ నాణ్యత చాలా బాగుందని భక్తులు సంతృప్తి వ్యక్తం చేయగా, దర్శనం మరింత వేగంగా జరిగేలా చూడాలని కోరారు.
సీఎం స్పందిస్తూ.. “భక్తుల సౌకర్యం కోసం ఇప్పటికే ఇంటిగ్రేటెడ్ కమాండ్ కంట్రోల్ వ్యవస్థను ఏర్పాటు చేశాం. త్వరలోనే ఆర్టిఫిషియల్ ఇంటెలిజెన్స్ (AI) టెక్నాలజీని ప్రవేశపెట్టి దర్శన ప్రక్రియను మరింత వేగవంతం చేస్తాం” అని హామీ ఇచ్చారు.
ఈ కార్యక్రమంలో రాష్ట్ర మంత్రి అనగాని సత్యప్రసాద్, టీటీడీ ఛైర్మన్ బీఆర్ నాయుడు, ఈవో ఎం. రవిచంద్ర, పలువురు ఎమ్మెల్యేలు మరియు టీడీపీ ముఖ్య నాయకులు పాల్గొన్నారు.
