కొత్తగా మకాం మార్చేదేముంది.? పేరుకే అమరావతిలో చంద్రబాబు ఇల్లు.. నిజానికి, అది ఆయన అద్దెకు వుంటోన్న ఇల్లు మాత్రమే. సొంతిల్లు మాత్రం తెలంగాణలోని హైద్రాబాద్లోనే వుంది.
హైద్రాబాద్కి చంద్రబాబు మళ్ళీ మకాం మార్చేయనున్నారంటూ ప్రచారం జరుగుతున్న వేళ, చాలామంది పై విధంగానే చర్చించుకుంటున్నారు. తెలంగాణ రాజకీయాల్లో మళ్ళీ యాక్టివ్ అయ్యందుకు చంద్రబాబు వ్యూహాత్మకంగా పావులు కదుపుతున్నారు.
నిజానికి, తెలంగాణతో పోల్చితే ఏపీలో ఏం గొప్పగా లేదు తెలుగుదేశం పార్టీ. ఎప్పుడైతే తెలంగాణ రాష్ట్ర సమితి కాస్తా భారత్ రాష్ట్ర సమితిగా మారిపోయిందో, తెలుగుదేశం పార్టీ అధినేత నారా చంద్రబాబునాయుడు దాన్ని అడ్వాంటేజ్గా తీసుకునేందుకు అప్పటినుంచే వ్యూహరచన చేసి వుంటారు.
ఖమ్మం వేదికగా తెలంగాణ గడ్డపై రాజకీయాలు ఇంకోసారి షురూ చేసిన చంద్రబాబు, ఖమ్మంలో కనిపించిన జనసందోహాన్ని చూసి ఉత్సాహపడ్డారు. తెలంగాణకు మకాం మార్చేద్దామా.? అన్న కోణంలో అప్పుడే పార్టీ ముఖ్య నేతలతో మంతనాలు కూడా జరిపారట.
తెలంగాణ రాష్ట్ర సమితి కాస్తా భారత్ రాష్ట్ర సమితి పేరుతో తెలంగాణ వేదికగా రాజకీయాలు చేసినప్పుడు, తెలంగాణ వేదికగా తెలుగుదేశం పార్టీ ఎందుకు రాజకీయాలు చేయకూడదన్న చంద్రబాబు లాజిక్కులోనూ అర్థముంది. కాకపోతే, తెలంగాణ సమాజం చంద్రబాబుని ఎలా ముందు ముందు రిసీవ్ చేసుకుంటుందన్నదే మిలియన్ డాలర్ల ప్రశ్న.
చంద్రబాబు తెలంగా రాజకీయాలపై బీఆర్ఎస్ నేతలు కవిత, హరీష్ రావు తదితరులు గుస్సా అవుతుండడం చూస్తోంటే, టీడీపీ మళ్ళీ తెలంగాణలో పుంజుకుంటుందేమోనన్న నమ్మకం టీడీపీ శ్రేణుల్లోనూ పెరుగుతోంది.