ప్రత్యేక హోదా రావాలంటే తెలుగుదేశం ఖాళీ అవ్వాలి!
అవును మీరు చదువుతున్నది కరెక్టే. ప్రత్యేక హోదా రావాలంటే తెలుగుదేశం ఖాళీ అవ్వాల్సిందే. ఇదేం లింక్ అని అనుకుంటున్నారా బిజెపి ఆలోచన అలా ఉంది మరి.
తెలుగుదేశం పార్టీ ఆంధ్రప్రదేశ్లో ఉన్నంతవరకు బిజెపి ఒకవేళ ప్రత్యేక హోదా ఇచ్చినా కూడా బిజెపికి వచ్చే మేలు ఏమీ ఉండదు. ఎందుకంటే గడచిన ఎన్నికల్లో తెలుగుదేశం పార్టీకి సుమారు 40 శాతం ఓట్లు వచ్చాయి. అదే ఎన్నికల్లో బీజేపీకి కేవలం ఒక్క శాతం ఓట్లు మాత్రమే వచ్చాయి. ఇటువంటి పరిస్థితుల్లో బిజెపి ఈ రాష్ట్రంలో బలపడాలంటే ప్రస్తుతం ఉన్న వైయస్సార్ కాంగ్రెసు పార్టీకి ప్రత్యామ్నాయంగా ఎదగాలి. అంతేగాని నాలుగు పార్టీలు ఒక పార్టీగా ఉంటే బిజెపి ఎదుగుదల అంత సులభం కాదు.
అందుకే బిజెపి రాజ్యసభలో బలం పెంచుకునే నేపథ్యం అని చెబుతూ తెలుగుదేశం నాయకులని లాగడానికి ప్రయత్నిస్తుంది. ఈ క్రమంలో వచ్చే రోజుల్లో తెలుగుదేశం శాసనసభా పక్షం కూడా నిట్టనిలువునా చీలి బిజెపి పక్షాన చేరుతారనే ప్రచారం జరుగుతుంది.
ఒకసారి తెలుగుదేశం ఎమ్మెల్యేలు బీజేపీలో చేరాక బిజెపి ప్రధాన ప్రతిపక్ష పాత్ర పోషిస్తూ ఈ రాష్ట్రానికి ప్రత్యేక హోదా ఇవ్వాలి అనేది వారి వ్యూహం. అందుకే తెలుగుదేశం ఖాళీ అయితే తప్ప ఆంధ్ర ప్రదేశ్ కి ప్రత్యేక హోదా రాదు.