స్థానిక సంస్థల ఎన్నికలకు రాష్ట్ర ప్రభుత్వం సిద్ధంకాగానే వైకాపా టిడిపి పక్షాల మధ్య బిసిల రిజర్వేషన్ హాట్ టాపిక్ గా మారింది. తమ కోటా తగ్గి పోతున్నందుకు బిసిలు మండి పడుతున్నారు. ఇది వైకాపాకు నష్టమే.హైకోర్టు తీర్పు మీద సుప్రీంకోర్టుకు అప్పీలుకు వెళ్లకుండా రాష్ట్ర ప్రభుత్వం ఎన్నికలకు సిద్ధం కావడంతో టిడిపి ఎదురుదాడి మొదలు పెట్టింది. ఈ అంశంలో వైకాపా ఆత్మ రక్షణలో పడింది. హైకోర్టు తీర్పు ప్రకారం 34 శాతం వున్న బిసిల రిజర్వేషన్ 24 శాతానికి పడిపోతుంది. అందువలన వైకాపా ను బిసిల ముందు దోషిగా నిలబెట్టడంలో ఇప్పటికే టిడిపి విజయం సాధించింది. ఇంతకు మునుపు బిసిలకు 34 శాతం రిజర్వేషన్లు వుండేటివి.
ఈ మధ్య స్థానిక సంస్థల ఎన్నికలు గురించి హైకోర్టు తీర్పు ఇచ్చిన తర్వాత ప్రతాప రెడ్డి అనే వ్యక్తి ఏకంగా సుప్రీంకోర్టు కెక్కారు. గతంలో సుప్రీంకోర్టు తీర్పు ప్రకారం 50 శాతానికి రిజర్వేషన్లు మించ కూడదని వున్నా ఆంధ్ర ప్రదేశ్ లో 59.85 శాతం వుందని సవాల్ చేశారు. సుప్రీంకోర్టు ఈ అంశం తేల్చే బాధ్యత హైకోర్టుకు అప్పగించింది. తుదకు హైకోర్టు రాష్ట్ర ప్రభుత్వం జారీ చేసిన జీవో కొట్టి వేసి 50 శాతానికి రిజర్వేషన్ లు పరిమితం చేయాలని తీర్పు చెప్పింది
ఎన్నికలు మార్చి లోపు నిర్వహించక పోతే ఆర్థిక సంఘం నిధులు గల్లంతు కావడానికి తోడు రోజుల గడిచే కొద్దీ ప్రభుత్వ వ్యతిరేకత పెరుగుతుందని భావించి ఎన్నికలకు ప్రభుత్వం సిద్ద మైంది. రిజర్వేషన్లు తగ్గిపోతున్నందున బిసి ల్లో వైకాపా యెడల వ్యతిరేకత పెంచేందుకు టిడిపి సర్వశక్తులు ఒడ్డుతోంది. వాస్తవంలో ఇది వైకాపాకు మైనస్సే.ఇది తట్టుకొనేందుకు సుప్రీంకోర్టులో కేసువేసిన ప్రతాప రెడ్డి మీవాడు అంటే మీవాడనే వాదులాట రంజుగా సాగుతోంది. ప్రతాప రెడ్డి రాష్ట్ర రెడ్డి సంఘం అధ్యక్షుడు అని వైకాపా యే అతని చేత కేసు వేయించిందని టిడిపి నేతలు ఆరోపించుతుంటే ప్రతాప రెడ్డి లోకేష్ తో కలసి తీసుకున్న ఫోటోలు వున్నాయని అతను టిడిపి కి చెందిన వ్యక్తి అని వైకాపా నేతలు చెబుతున్నారు. ఇంతకీ ఈ ప్రతాప రెడ్డి నోరు తెరవ లేదు. స్థూలంగా చూస్తే ఒకవేళ అతను టిడిపి నేత అయివుంటే వైకాపా నేతలు అతన్ని పట్టుకొచ్చి పత్రికల వారి ముందు నిలబెట్టే వారు. ఇది ఇలా వుండగా ఆ ప్రతాప రెడ్డి ఎవరో ఏమో గాని మట్టుకు బిసిలకు తీరని ద్రోహం చేశారు. ఈ అంశంలో సుప్రీంకోర్టుకు అప్పీలుకు వెళ్లకుండా ఎన్నికలకు వెళుతున్న జగన్మోహన్ రెడ్డి ప్రభుత్వం బిసిల నుండి ఎంతో కొంత అసంతృప్తి ఎదుర్కోక తప్పదు.