టాలీవుడ్‌లో సంచ‌ల‌నం సృష్టించిన కాంబినేష‌న్ విజ‌య్ దేవరకొండ. సందీప్ రెడ్డి వంగ. ఈ ఇద్ద‌రి తొలి క‌ల‌యిక‌లో వ‌చ్చిన చిత్రం `అర్జున్‌రెడ్డి`. సైలెంట్‌గా వ‌చ్చిన ఈ చిత్రం తెలుగు సినిమా ఫార్ములాను బ్రేక్ చేయ‌డ‌మే కాకుండా స్టార్ హీరోల్లో ఒక్క‌సారిగా వ‌ణుకు పుట్టించింది. అండ‌ర్ డాగ్‌ల వ‌చ్చిన విజ‌య్ దేవరకొండ, సందీప్ వంగ చాలా మందికి ఈ సినిమా భారీ ఛాలెంజ్‌నే విసిరారు.
3గంట‌ల నిడివి గ‌ల సినిమా.. సినిమాటిక్ సీన్‌లు, డైలాగ్‌లు.. హీరో ఇంట్ర‌డ‌క్ష‌న్‌…రేర్ యాటిట్యూడ్ వున్న హీరో క్యారెక్ట‌రైజేష‌న్‌.. సినిమా చూస్తున్న వారికి సినిమాలా కాకుండా మ‌న క‌ళ్ల ముందు జ‌రుగుతున్న ఓ భ‌గ్న ప్రేమికుడి క‌థ‌గా సాగే క‌థా క‌థ‌నాలు.. ఇలా చాలా విషయాల్లో తెలుగు సినిమా రొటీన్ ఫార్ములాను బ్రేక్ చేసింది `అర్జున్‌రెడ్డి`. `శివ` త‌రువాత ఆ స్థాయిలో గేమ్ ఛేంజ‌ర్‌గా నిలిచింది.
ఇలాంటి సంచ‌ల‌న చిత్రాన్ని అందించిన కాంబినేష‌న్ మ‌ళ్లీ క‌లిసి ప‌నిచేయ‌బోతోందా? అంటే రౌడీ హీరో విజ‌య్ దేవరకొండ ఈ రోజు పెట్టిన ట్వీట్ ఇదే విష‌యాన్ని స్ప‌ష్టం చేస్తోంది. విజ‌య్ దేవరకొండ తాజాగా క‌రోనా కార‌ణంగా ఇబ్బందులు ప‌డుతున్న మ‌ధ్య త‌ర‌గ‌తి కుటుంబాల కోసం `ది దేవరకొండ ఫౌండేష‌న్‌`ని ప్రారంభించిన విష‌యం తెలిసిందే. ఈ విష‌యం తెలిసి విజ‌య్‌ని అభినందిస్తూ సందీప్‌రెడ్డి వంగ ట్విట్ట‌ర్‌లో ఓ పోస్ట్ పెట్టాడు. వెంట‌నే స్పందించిన విజ‌య్ దేవరకొండ `నిన్ను మిస్స‌వుతున్నా వంగా…ఈ లాక్‌డౌన్ స‌మ‌యంలో 2 లేదా 3 స్క్రిప్ట్‌లని పూర్తి చేయి ప్లీజ్..నీతో షూటింగ్ చేయ‌డానికి రెండేళ్లు వేచి చూడ‌లేను` అని ట్వీట్ చేయ‌డం ఆస‌క్తిక‌రంగా మారింది.