దేశవ్యాప్తంగా ఒకే సమయంలో ఎన్నికలు నిర్వహించేందుకు కేంద్రం చేపట్టిన ప్రయత్నాలు వేగవంతమయ్యాయి. జమిలి ఎన్నికల ప్రతిపాదనకు సంబంధించి కేంద్ర కేబినెట్ తాజాగా ఆమోదం తెలిపింది. ఈ నిర్ణయం తీసుకోవడం ద్వారా ప్రస్తుతం పార్లమెంట్‌ శీతాకాల సమావేశాల్లో దీనికి సంబంధించిన బిల్లులు ప్రవేశపెట్టే దిశగా ప్రభుత్వ యంత్రాంగం పనిచేస్తోంది. ఈ ప్రతిపాదనపై వివిధ రాజకీయ పార్టీల నుంచి భిన్న అభిప్రాయాలు వ్యక్తమవుతున్నాయి.
మాజీ రాష్ట్రపతి రామ్‌నాథ్‌ కోవింద్ నేతృత్వంలో జమిలి ఎన్నికలపై ఏర్పాటైన కమిటీ కీలకమైన నివేదికను రాష్ట్రపతికి సమర్పించింది. ఈ నివేదికలో రెండు దశలుగా ఎన్నికలు నిర్వహించాలని సూచించారు. మొదటి దశలో లోక్‌సభ, అసెంబ్లీ ఎన్నికలు నిర్వహించాలి. తరువాత స్థానిక సంస్థల ఎన్నికలు పూర్తిచేయాలని సూచించారు. ఈ సిఫారసులపై కేంద్రం సమాలోచనలు చేస్తోంది.
ఇదే సమయంలో, జమిలి ఎన్నికల ప్రతిపాదనకు 30కు పైగా పార్టీలు మద్దతు తెలపగా, కాంగ్రెస్ సహా 15 పార్టీలు దీనిని వ్యతిరేకిస్తున్నాయి. కాంగ్రెస్ పార్టీ ప్రజాస్వామ్య విలువలకు ఇది తగినదేమీ కాదని అభిప్రాయపడుతోంది. ప్రజాస్వామ్యంలో ఎప్పుడు అవసరమైతే అప్పుడు ఎన్నికలు నిర్వహించాలనే కాంగ్రెస్ వాదనతో భిన్నాభిప్రాయాలు ఉత్పన్నమయ్యాయి.
జమిలి ఎన్నికలపై చర్చలు కొనసాగుతున్నా, అన్ని పార్టీల మద్దతు పొందడం అనేది ప్రధాన సవాల్‌గా మారింది. వివిధ రాష్ట్రాల శాసనసభ స్పీకర్లతో, ఇతర పార్టీల ప్రతినిధులతో సంప్రదింపులు చేయాలని కేంద్రం యోచిస్తోంది.