వేటాడండి! – చిరుపై గర్జన – ‘సైరా’ టీజర్!
మెగా స్టార్ అభిమాన ప్రపంచం ఎంతగానో ఎదురు చూస్తున్న మెగా పీరియడ్ యాక్షన్ మూవీ ‘సైరా’ టీజర్ వచ్చేసింది… ‘చరిత్ర స్మరించుకుంటుంది…ఝాన్సీ లక్ష్మీ బాయి…చంద్ర శేఖర ఆజాద్…భగత్ సింగ్ లాంటి ఎందరో మహనీయుల ప్రాణ త్యాగాలని… కానీ ఆ చరిత్ర పుటల్లో కనుమరుగయ్యాడు ఒక వీరుడు…ఆంగ్లేయులపై తొలిసారి యుద్ధ భేరీ మోగించిన రేనాటి సూర్యుడు…’ అంటూ పవర్ స్టార్ పవన్ కళ్యాణ్ వాయిసోవర్ వస్తూంటే, ఉయ్యాలవాడ నరసింహా రెడ్డిగా మెగాస్టార్ చిరంజీవి గుర్రం మీద రౌద్ర రూపంతో ఆంగ్లేయ సేనలతో హోరా హరీ పోరాడే దృశ్యాలు ఫ్లాష్ అవుతాయి. ‘వేటాడండి!’ …అంటూ బ్రిటిష్ దొర గర్జిస్తూంటాడు. బాణాలూ బల్లేలూ దూసుకురావడం, కత్తులు కటార్లు ఖంగు మనడం, ఫిరంగులు, వాహనాలు పేలడం, హేండ్ టు హేండ్ పోరాటాలు చేయడం…ఒకటేమిటి, సకల యుద్ధ కళలూ చిరంజీవి యమ ఎనర్జిటిక్ గా ప్రదర్శిస్తున్నారు. వందలాది తెల్ల సైన్యాలతో ఏకవ్యక్తి సైన్యంగా తలపడుతున్నారు…
ఫ్యాన్స్ ని ఫుల్ ఖుష్ చేసేలా వున్న ఈ యాక్షన్ టీజర్ లో ఇంకా అమితాబ్ బచ్చన్, నయనతార ల వంటి స్టార్లు పాల్గొన్న దృశ్యాలని మిళితం చేశారు. ఒక నిమిషం 47 సెకన్ల ఈ టీజర్ ని ఎక్కడా స్లో చేయలేదు. కళ్ళప్పగించి చూసే స్పీడుతో, విజువల్ హంగామాతో, భారీ ఎత్తున యాక్షన్ దృశ్యాలతో మెరుపులా మెరిసిపోతుందీ టీజర్…చివర చిరంజీవి గర్జనతో… ‘చరిత్రలో మనం ఉండక పోవచ్చు…కానీ చరిత్ర మనతోనే మొదలవ్వాలి!” అంటూ.
తొలితరం స్వాతంత్య్ర సమరయోధుడు, రాయలసీమ పోరాట యోధుడు, కడప కేంద్రంగా బ్రిటిషు వారిపై పోరాటం చేసిన అమరవీరుడు ఉయ్యాలవాడ నరసింహారెడ్డి పాత్రలో మెగా స్టార్ చిరంజీవి ఈ టీజర్ తోనే హిట్ కొట్టారు. ఇక అక్టోబర్ 2న మూవీ విడుదల కావడమే ఆలస్యం… తెలుగుతో పాటు హిందీ, తమిళం, మలయాళం, కన్నడ భాషల్లో విడుదలకు ముస్తాబు అవుతోంది. కొణిదెల ప్రొడక్షన్‌ బ్యానర్ పై రామ్‌ చరణ్‌ నిర్మిస్తున్నారు. అమితాబ్ బచ్చన్, విజయ్‌ సేతుపతి, నయనతార, తమన్నా, జగపతిబాబు, సుదీప్‌ ప్రధాన పాత్రలు పోషిస్తున్నారు..సురేందర్ రెడ్డి దర్శకత్వం వహిస్తున్నారు.
