ఏపీ ముఖ్యమంత్రి చంద్రబాబు నాయుడు రాష్ట్ర అభివృద్ధి పట్ల తన దృఢసంకల్పాన్ని మరోసారి ప్రదర్శించారు. రెండు రోజుల పాటు జరిగిన జిల్లా కలెక్టర్ల, ఉన్నతాధికారుల సమీక్షా సమావేశంలో ఆయన అధికార యంత్రాంగానికి స్పష్టమైన మార్గనిర్దేశం చేశారు. తన సుదీర్ఘ రాజకీయ అనుభవాన్ని పంచుకుంటూ, అన్ని శాఖల పనితీరుపై పూర్తిగా తనదైన ముద్ర వేసేందుకు సిద్ధమయ్యారు.
చంద్రబాబు తన సమావేశాల్లో జిల్లా కలెక్టర్లు, ఎస్పీలు తమ పాత్రను సరిగ్గా నిర్వర్తించాలని చెప్పారు. పనితీరు బాగోకపోతే ఎవ్వరినీ వదిలిపెట్టబోమని, అవసరమైతే కలెక్టర్లు లేదా మంత్రులను కూడా పక్కన పెట్టేస్తానని స్పష్టం చేశారు. ప్రజా సేవకులుగా తమ బాధ్యతలు సక్రమంగా నిర్వహించాల్సిన అవసరాన్ని హైలైట్ చేస్తూ, అవినీతి, నిర్లక్ష్యం వంటి అంశాలకు పాలనలో చోటు ఉండకూడదని హెచ్చరించారు.
ఈ సమావేశాల్లో ప్రతీ శాఖపై చంద్రబాబు విపులంగా చర్చించారు. పెండింగ్‌లో ఉన్న సమస్యలు మూడు నెలల్లో పరిష్కరించాలని కలెక్టర్లను ఆదేశించారు. అంతేకాకుండా, ప్రతి ఆరు నెలలకు సమీక్షా సమావేశాలు నిర్వహించి, పనితీరును మరింత మెరుగుపరిచే యోచనలో ఉన్నారు. వినూత్న ఆలోచనల ద్వారా సమస్యలను పరిష్కరించడం అవసరమని, నిధులపై మాత్రమే ఆధారపడటం తప్పని గుర్తుచేశారు.
చంద్రబాబు తన పాలన శైలిని మరింత గట్టిగా చూపించారు. ప్రజలతో నేరుగా మమేకం కావాలని, వారి సమస్యలను దృష్టిలో ఉంచుకుని ప్రభుత్వ కార్యక్రమాలను అమలు చేయాలని స్పష్టం చేశారు. ఆయన మాట్లాడిన మాటలు ప్రభుత్వం దిశగా మద్దతుగా నిలిచేలా ఉండటమే కాకుండా, ఏపీలో పాలనలో కొత్త శక్తిని నింపేలా ఉన్నాయి.